galina col pien

Par siè che magna

1 Galina ruspante bela grossa e ciciota;

1 salsicia magra de porzelo (1 eto e mezo)

2 eti de carne masenà de manzo;

2 eti de carne masenà de porzelo;

8 Sculieri de grana gratà;

2 ovi intieri;

Cuore, fegato e stomego dela galina (i se ciama figaini o revìdui)

2 Sculiarini de erbete fine masenà (timo, oraro, basalìco, ec.)

1 Zeola

1 Ganba se sèlino;

1 Carota;

ojo, pévaro e sale quanto che ghe ne serve.

Se fa cussì:

1. Sa curè la galina, no ste butare via i revìdui; sa la conprè pronta portè a casa anca i revidui.

2. Tridare fin assè i figaini o revidui, dopo verli lavà par ben ( al stomego bisogna tirarghe via la pelesina interna);

3. Smissiare ben tuto insieme la carne masenà, la salsicia (pelà e desfata), el grana, i ovi e i figadini tridà, justando de sale e de pévaro e zontando le erbete (va ben anca quele seche);

4. Ciapare la galina e inpenirghe el pantazo co tuto sto ben de dio e cusire ...el saco, par davanti e par de drio;

5. Ciapè na pignatona co aqua de bójo, tuffeghe drento la carota, la zeola e el sèlino e po' la galina, che la ga da stare larga!

6. Assè cusinare col quercio par almanco do ore o, comunque, fin che la carne la vien tènara;

7. A metà cotura justare de sale (co sale grosso);

8. Cavè dal fogo, tajè a tochi la pora bestiola e servì on toco de galina e na parte del pien;

9. I tochi de carne dela galina la vien za saoria par ben, ma se uno vole zontarghe gusto, i se condisse co na salseta verde o co del cren;

10. Bevì quel che ve piase, ma no massa...

11. Par el contorno va ben purè de patate o erbete de canpo cote;

12. El brodo che vanza va ben par la sera co do tajadelete fate in casa...