Par quatro che magna
2 carote
2 zeole
2 ganbe de sèlino, co foje e tuto
3 eti de fasoi borloti sichi
2 patate
3-4 coste de biéta
1/4 de na verza
2 zucoliti
2 spighi de ajo
Farina zala da polenta
Oio stravergine de oliva
Sale e pévaro
Formajo grana gratà
Se fa cussì:
1.Co l'ajo e 1 zeola fare on bel desfrito, po' cavàre l'ajo
2.Tajare a tochiti tute le altre verdure e butarle in pignata, co tanta aqua, come par fare el menestron, e assare cusinare par ben;
3.A fine cotura passare tuto col passaverdure. Ga da restare on brodo bastanza liquido! Al caso zontarghe aqua;
4.Metare el brodo sol fogo e far bòjare justare de sale e pévaro e po' butarghe, on fià par volta, la farina (come par fare la polenta). Se mete quanta farina che serve in modo che ala fine vegna fora na polentina tènara-tènara, da magnare col sculièro;
5.Cusinare par almanco meza ora, smissiando senpre, senò se taca tuto!!!
6.Servire caldo de bojo, versando on filo de ojo stravergine de oliva e infromajando par ben;
7.El colore dipende dale verdure che se mete (a volte no le se cata tute). El xe on piato da inverno fredo, che se gusta mejo se fora nèvega.
