Fagoto de piton

Par oto che magna

On peto de piton de 2 chili, intiero

2 fete de sopressa co l'ajo, grosse 1/2 zm.

2 fete de speck grosse 1/2 zm.

2,5 eti de ricota

5 fete de panzeta

1 zeola

1 carota

1 sculiero de erbete miste secà (osmarin, salvia, timo,ec.)

sale

3 sculieri de ojo stravergine de oliva

1 goto de vin bianco seco

spago da cusina

Se fa cussì:

1. Tajare el peto de piton in modo da fare na specie de bisteca unica;

2. Masenare tuto insieme la sopressa, el speck e na feta de panzeta: fare on paston de sta roba smissiando ben co la ricota;

3. Destirare la bistecona de piton, salarla e spolvararla co na parte dele erbete;

4. Metarghe dessora el paston, assando tuto torno on paro de zm. de bordo;

5. Inpiegare a metà la feta e cusirla tuto torno col spago da cusina (inzegneve par l'ago, ma i ghe ne vende de fati aposta...);

6. Fissare do fete de panzeta par parte, jutandove co d'i stecadenti;

7. Spolvarare ben de sale e col resto dele erbete da tute do le parte el fagoto;

8. Tajare a tochi grossolani la zeola e la carota e metarle so na tecia da forno co l'ojo;

9. Fare rosolare a fogo vivo da tute do le parte el fagoto;

10. Metare in forno a 180° e cusinare ben, dopo verghe butà so la tecia el vin bianco. Ricordeve de girare ogni tanto el fagoto parché el ciapa colore da tute do le parte;

11. 2 ore e meza dovaria bastare, ma regoleve dal colore e ste 'tenti che no se brusa la panzeta (bagnare col pocio);

12. A cotura finia, cavàre dal forno e assare rafredare on poco e tajare fete de 1 zm. de spessore;

13. Intanto zontarghe on goto de brodo de dado al fondo de cotura e darghe on bojo zontandoghe 2 sculiarini de farina: basta du minuti;

14. Frulare tuto el pocio, che'l servirà par butarlo caldo de bojo so le fete del fagoto servie sol piato;

15. Sa ghi par le man del bon vin Raboso, la festa xe fata.