Risi e Bisi

Par quatro che magna

4 eti de risi;

Meza zeola;

Du eti de panzeta da tajare a cubiti;

3- 4 eti de bisi frischi destregolà, mejo se i xe picinini;

Mezo eto de butiro e on sculiero de ojo;

On litro de brodo de polastro o de manzo;

Calche rameta de parsìnbolo, pévaro, sale.

Se fa cussì:

1. Fare on desfrito col butiro, l’ojo e la zeola, zontandoghe du tri sculieri de brodo e la panzeta;

2. Butarghe i bisi e tegnere alto el fogo (cussi i bisi resta pì verdi ) assando che i bisi se fiapa (i ga da supare tuto el liquido, ma atenti…); salare solo quando che i bisi sarà coti (se fà senpre cussì co i bisi !! ).

3. Métare in cotura i risi sol brodo, butandoghe i bisi e tuto el resto a metà cotura;

4. A cotura finia la minestra (no’l xe risoto) la dovarà essare né fissa né mola, e de on bel colore verde …piselo;

5. Prima de servire zontarghe on bel pugno de parsìnbolo tridà, del pévaro e, sol piato, informajare par ben.

6. Racomandazion : pì bisi se mete, pì bona vien la piatanza…

P.S.: Par no butare via gnente, se dovarìa far bójare a parte anca le teghe d'i bisi, dopo verle lavà par ben. Le fà on brodeto dolze che se pole doparare par cusinare i risi, smissià col brodo dela riceta.